tutlayt n ufessa

tutlayt n ufessa





Adfir n kri gat tin wudc, igh yafud asmerghi n uzenzar f udem n ill ! igh d iqqen idd s tillas ,izi idess tittawin !ifsi yan igan ussuf g iwiz n wadan ,ijlu ger imiren n uswggas,ig imir war assagh ,udmens war tifiras ,ur t ukzen imessan ,d ur t ju syafan iwdan !!!



Assef irwas gwmas ,aswggas idfer t wayyad ,ur ta ju izdar « ussuf » ad izdi tigwriwin d gratsent s ughanib n usmammi , afad ad isifsus f ull ns anzgum d wattan li yasen yugel d ad yals i tifert f gar anazzarfu li yas tmla tudert.



Tuckad talallit ns g imir n tagerst,tmun d issaffan n inzaren d ijawwan saylalen.



Tkers tudert g tudemtns tawarraght !tkess as itri n tumert ger allens,tuker as imir n tafsut g imall ns, tsndudi akw igenwan s iggign , tsduhdu ikaln afad awr isella yan i tghuyyit ns izwarn.



Assef ad ,rzemn akw tazzanin dis lulnin tittawinsn ,amer ussuf igellin , ur d is yugi is ukkan iggumi s mamenk !!!







izri assef ns izwarn gh titt n ufessa, adfir n tin-wudc ,akud ligh tmerks tifawt n uzal d tillas n idd,irzem azzan tittawin nes f umadal n timlullay ,isbburi tent ,ikwcdas awllaf n tudert g allnes ur iffaw ur illas .

zrint ussfan n timzins zund assemid ,aylli gisent ikwti iggu ur idrus,g timektit ns ass ligh yafud "baba msàoud"ifel abakccuns i tamghart ns ,ar sers tbekkas d ar sers ttas aqllal ns ik nna t kwti !!

ghkelli ur ju itu talulluct ns ityakarn ger tillasin n ulawn d tawwargitns irzan s ufus n tillawt, d ur ssar itu tawqqast n usnuhyu ifeln azemmul g ullns !!!

imghi ussuf gh urti n wiyyad,ur asn igi ula ganas,mac imyar ad isen idru timyurin nsen d ad isen imdi tamimt n wawal nsen imerksen s tugt n tutlayin teg tutlayt n ufessa yat gisent.

awd yan g umadal ad anemmar izdar ad itu assagh ns amer igh as tjela timektit ns ,negh fellas ikka anufel am ussuf ! igellin afgan ad ,itu beda taguri li yas fkan imarawn ns zegh talalitns , ur ju isyafa is iga wins,awd iwdan li yas sutelnin ,aggugn beda f ullns ,meqqar izri akw timzins g urti nsn.

ilkem d ussuf yat tizi ur sul izdar ad isentel timzwinyin n iseqsitn li yas beda tsutuln gh unnelli ns .

iceqqa fllas ad yakwz tiggest liyas illan ger timiwa , irmi attas ,awal d iwdan ur as isugr amya,afessa izdegh ilsawn ,ghkelli tkka twda f ullawn!

ghkelli beda imyar, irur ""ussuf"" igawr dar ill igin tazrut n imarayn, g tannayt ns is ill ar isawal s ills n tiddangiwin,immagh ad yakwz mad tinint , mac awd ntan ur irar f aseqsins axatar ,yinyas s wawal idran ,zund igh iksud ad as sellan urtan ligh imghi :

- max? max ur agh allagh meqqar qqengh s tgudi?

max ur agh tallat meqqar ar thittint tiddangiwin nk s wattan ?

man anelli izdarn ad irar f usqsi n ussuf ,man anufl irwas anuflns? awd ill ifessa , awd afessa tga tutlayt .

issiwn ussuf allns i yilll ar idessa i tikli izwarn g tudert ns ,achku iferk is agh iseqsa assa n ussmammi d umetta n taddart ad!

asemg ad ur igi amer anafal ur t yumi umadal ,ar itlli s wayyad !! teg tarula yat ger timyurin nes ! ur ju izmumg zergh ull nes ,ur ju smittiwent ittawin nes ,achku aylli yugel i ull ns yuger umeta.igellin ur igi amer afgan irban idurar n izengign d wattan n tasutin ,takat n wakal ,tagat n izuran

awd yan isella itghuyyit n ussif ,awd yan ighwra tabrat ns,achku tyara s tutlay n ufessa

man tumert as itlli ufgan iluln ger ilalen ig agherrabuns war aftas?


reqia touw
ass n : 31/07/08
tamazirt n isel d ideqqi (asfi)